A Second Chance (Harinamava Nenedare)- Kannada (ಕನ್ನಡ)

ಹರಿನಾಮಸ್ಮರಣೆಯ ತತ್ವ, ಸತ್ವ, ಮಹತ್ವಗಳ ಸಂಗಮದ ರಂಗಸ್ಥಳ ಈ ಪುಸ್ತಕ, ಕಲಿಯುಗದಲಿ ಹರಿನಾಮವ ನೆನೆದರೆ ಕುಲ ಕೋಟಿಗಳುದ್ಧರಿಸುವುವೋ ರಂಗ’ ಎನ್ನುವ ದಾಸರ ಮಾತಿನ ದರ್ಶನ ಹಾಗೂ ನಿದರ್ಶನ ಶ್ರೀಲ ಪ್ರಭುಪಾದರ ಈ ಕೃತಿ. ಹರಿನಾಮಸ್ಮರಣೆಯೊಂದಕ್ಕೆ ಪಾಪಪರಿಹಾರ ಮಾಡಲು ಎಷ್ಟು ಸಾಮರ್ಥ್ಯವಿದೆಯೋ ಅಷ್ಟು ಪಾಪ ಮಾಡಲು ಎಂತಹ ಕಡುಪಾಪಿಗೂ ಸಾಮರ್ಥ್ಯವಿಲ್ಲವೆಂಬುದನ್ನು ಈ ಪುಸ್ತಕ ಸಮರ್ಥವಾಗಿ ನಿರೂಪಿಸುತ್ತದೆ. ಹರಿಯ ಸ್ಮರಣೆಯಾದರೆ ಪುಳಕ ರೋಮಾಂಚನವಾಗುತ್ತದೆ. ಹರಿಯ ಸ್ಮರಣೆಯಾಗಬೇಕು. ಅವನ ಮಾಟದ ನೋಟದಲ್ಲಿ ಮನಸ್ಸು ಮರೆಯಬೇಕು. ಮಾತು ಮಾತಿಗೆ ಹರಿನಾಮದ ಝಳಕು ಬೆಳಕಾಗಿ ತುಳುಕಬೇಕು. ಪುಟ್ಟ ಕಂದ ಕೃಷ್ಣ ನಮ್ಮ ಮನಸ್ಸಿನಲ್ಲಿ ಬೆಳಗಬೇಕು. ಅವನ ಕಣ್ಣಿನ ಕಾಂತಿ, ಅವನ ಮುದ್ದು ಮುಖದ ಶಾಂತಿ ನಮ್ಮ ಬದುಕಿಗೆ ತಂಪು ತರಬೇಕು. ಕಂಪು ತರಬೇಕು. ಸೋಂಪು ತರಬೇಕು. ಹರಿನಾಮಸ್ತರಣೆಯ ಇಂಪು, ಅದರ ಕಲಕಲ ಕಿಲಕಿಲ, ನಮ್ಮ ಬದುಕಿನ ತುಂಬಾ ಗಾಳಿ ಗಂಧ ಪರಿಮಳವೂ ಹರಡಿಕೊಳ್ಳಬೇಕು. ಈ ಮಹದಾಶಯಗಳನ್ನು ನಿಜಮಾಡುವ ದಿಕ್ಕುದೆಸೆಯನ್ನು ಪ್ರಭುಪಾದರು ಈ ಪುಸ್ತಕದಲ್ಲಿ ತೋರಿಸಿದ್ದಾರೆ. ಈ ಜೀವನ ಯಾತ್ರೆಯಲ್ಲಿ ಕಡೆಯ ಘಳಿಗೆಯಲ್ಲಿ ನಮ್ಮೊಡನೆ ಬರುವುದು, ಮುಂದೆಯೂ ನಮ್ಮೊಡನೆ ಇರುವುದು ನಾರಾಯಣ ನಾಮ ಸ್ಮರಣೆಯೊಂದಲ್ಲದೆ ಬೇರೆ ಯಾವುದೂ ಅಲ್ಲ ಎನ್ನುವುದನ್ನು ಅತ್ಯಂತ ಪರಿಣಾಮಕಾರಿಯಾಗಿ ಅಜಮಿಳನ ವೃತ್ತಾಂತದ ಮೂಲಕ ಶ್ರೀಲ ಪ್ರಭುಪಾದರು ಇಲ್ಲಿ ಸಮರ್ಥಿಸಿದ್ದಾರೆ. ಯಾರಿಗೂ ಸಮಯ, ವ್ಯವಧಾನ, ಸಹನೆ ಇಲ್ಲದ ಈ ಕಾಲದಲ್ಲೂ ಅತ್ಯಂತ ಸುಲಭವಾಗಿ ಎಲ್ಲರೂ ಮಾಡಬಹುದಾದದ್ದು ಹರಿನಾಮಸ್ಮರಣೆ. ಅಜಮಿಳನ ಕಥೆಯ ಮೂಲಕ ಶ್ರೀಲ ಪ್ರಭುಪಾದರು, ಎಂತಹ ಪಾಪಮಾಡಿದವರೂ ಸಹ ನಾರಾಯಣ ನಾಮಸ್ಮರಣೆಯಿಂದ ಪಶ್ಚಾತ್ತಾಪಗೊಂಡರೆ ಪರಿಶುದ್ಧರಾಗುತ್ತಾರೆ ಎಂಬ ಸತ್ಯವನ್ನು ಈ ಗ್ರಂಥದಲ್ಲಿ ತೋರಿಸಿದ್ದಾರೆ. ಮೌಲ್ಯಗಳನ್ನು ಕಳೆದುಕೊಂಡು ನೀತಿಭ್ರಷ್ಣವಾಗಿರುವ ಆಧುನಿಕ ಸಮಾಜದ ಶುದ್ದೀಕರಣಕ್ಕೆ ಇರುವ ಒಂದೇ ದಾರಿ ಹರಿನಾಮಸ್ಮರಣೆ, ಭಾಗವತದ ವಿಶಿಷ್ಟ ಕಥೆಯಾದ ಅಜಮಿಳನ ವೃತ್ತಾಂತ ಈ ಗ್ರಂಥ ರೂಪದಲ್ಲಿ ಬಂದಿರುವುದು ಕನ್ನಡ ಜನತೆಯ ಪುಣ್ಯ ವಿಶೇಷ.
ವಿದ್ಯಾವಾಚಸ್ಪತಿ ಡಾ|| ಅರಳುಮಲ್ಲಿಗೆ ಪಾರ್ಥಸಾರಥಿ (ಅಂತಾರಾಷ್ಟ್ರೀಯ ಖ್ಯಾತಿಯ ಹರಿದಾಸ ವಿದ್ವಾಂಸರು) |